Vonandi fannstu það sem þú varst að leita að

Í dag útskrifuðust átján nýir kvikmyndagerðararmenn úr Kvikmyndaskóla Íslands  við hátíðlega viðhöfn í Bíó Paradís.

Að vanda var mikil eftirvænting við skólaslit. Marteinn Knaran Ómarsson (Leikstjórn/Framleiðsla) hlaut verðlaun fyrir mynd sína Kviksyndi,  Ólöf Birna Torfadóttir (Handrit/Leikstjórn) fyrir myndina Síðasta Sumar og Bryndís Haraldsdóttir (Leiklist) hlaut einnig verðlaun fyrir sína mynd, Upstage.  Hin eftirsóttu verðlaun, Bjarkann hreppti í ár Marteinn Knaran Ómarsson.  Einnig hlaut Magnús Ingvar Bjarnason viðurkenningu fyrir góða ástundun og framúrskarandi námsárangur.

Kvikmyndaskólinn óskar verðlaunahöfum og öllum öðrum útskriftarnemum til hamingju með frábæran árangur og þakkar þeim sömuleiðis fyrir árin með þeim.

Átján nýir kvikmyndagerðarmenn útskrifast úr KVÍ

Nemendur Kvikmyndaskólans vinsamlegast athugið, fyrsta útgáfa námskrár vegna haustannar er komin inn á netið, slóðin er Info.kvikmyndaskoli.is ,þar sem þið getið rýnt í hana. Frekari upplýsingar um spennandi skólastarf komandi annar verða birtar á næstu dögum !

Stundaskrá fyrir haust 2017 komin í loftið

Í kjölfar undirritunar viljayfirlýsingar þess efnis að að Hugvísindasvið starfi með Kvikmyndaskólanum að uppbyggingu náms á háskólastigi að uppfylltum ákveðnum skilyrðum á komandi misserum hefur rektor Kvikmyndaskóla Íslands haldið áfram vinnu að því að samstarfið geti hafist fyrir alvöru.

Samkvæmt samkomulagi KVÍ og HÍ eiga fulltrúar HÍ að koma að ráðningu helstu stjórnenda KVÍ og hafa því stöður deildarforseta verið auglýstar lausar. Með þessu er ætlunin að auka fagleg vinnubrögð við ráðningu starfsfólks. Núverandi deildarforsetar hafa ekki sagt upp störfum og væntir skólinn að allir þeirra verði á meðal umsækjenda að undanskildum deildarforsetata í Deild 2, Skapandi tækni.

Hilmar Oddson, rektor hefur ritað nemendum og starfsfólki til að greina frá þessu og öðrum hlutum sem snerta skólastarfið, t.a.m. fréttir af fyrirhugaðri  hótelbyggingu við Grensásveg 1 þar sem skólinn er nú staðsettur.

 Það er rétt að eigendur þess húsnæðis sem hýsir starf okkar hafa uppi áform um að fjármagna byggingu “stór”- eða “háhýsis” á reit skólans. Það er hins vegar ekki búið að segja upp samningum við okkur og ekkert sem bendir til þess að okkur verði úthýst fyrr en við höfum fundið jafngott eða betra húsnæði. Þetta hefur okkur verið ljóst alveg frá því við fluttum hingað. Við munum flytja á “endastöð” á þessu eða næsta ári. Okkur líður flestum mjög vel hér á Grensásveginum, en ég leyfi mér að fullyrða að framtíðarhúsnæði skólans yrði að flestu leyti enn betra og myndi halda enn betur utan um starf okkar. Flutningar, ef og þegar af þeim verður, munu einungis verða til að bæta aðstöðu okkar og það til langframa. Fréttir af húsnæðismálum munu berast ykkur um leið og þær geta talist traustar.

Hilmar lýkur bréfi sínu með því að greina frá þeim gleðifréttum að á komandi hausti muni KVÍ eð IFS (Icelandic Film School) opna alþjóðlega deild við skólann. Um er að ræða nemendur í Deild 3, Handrit/leikstjórn, sem skipaður verður „glæsilegum fulltrúum ungs kvikmyndagerðarfólks frá þremur heimsálfum.“

Ljósi varpað á mikilvæg mál tengd Kvikmyndaskólanum

Knútur Haukstein Ólafsson vann vann nýlega verðlaunin Best Experimental Short á WideScreen Film & Music Video Festival í Miami í Bandaríkjunum fyrir útskriftarmynd sína úr Kvikmyndaskóla Íslands, Inferno.

Knútur  útksrifaðist úr skólanum árið 2015 úr leiklistardeild eins og leikstjóri myndar sinnar,  Kristín Ísabella Karlsdóttir.

Satt best að segja er ég ekki voða hrifinn af öllu þessu umstangi í kring um verðlaun. Þetta er í rauninni bara efnislegur hlutur sem er gerður til þess að mata egóið. Ég reyni eins og ég get að losa mig við þetta egó sem við höfum öll og einbeita mér að því að sýna æðruleysi en í þetta skiptið fékk egóið smá næringu og það verður bara að hafa það.

Segir Knútur þegar hann er spurður út í mikilvægi slíkra verðlauna.

Það sem þetta á virkilega að snúast um eru sögurnar sem við sem kvikmyndagerðarmenn og listamenn höfum að segja. Hverju við viljum koma á framfæri varðandi mannlega hegðun, lífið og tilveruna? Við viljum ná til fólks og fá það til þess að staldra við og hugsa. Fyrir mér er það sem þetta snýst allt saman um.

Knútur segir kvikmyndir geta breytt hugsunarhætti fólks til hins betra þó þær geti líka haft slæm áhrif.

En við krefjumst þess að fólk staldri aðeins við og fylgist með umhverfi sínu og pæli aðeins í því. Það er mikilvægt að við getum skoðað okkur sjálf og aðra með köldu og hlutlausu sjónarmiði og kvikmyndir geta falið í sér þann mátt. Kvikmyndin Moonlight (2016) er t.d. gott nýlegt dæmi um það. Áhorfendur sátu kjaftstopp í sætunum sínum eftir myndina vegna þess að þeir fengu eitthvað til að hugsa um. Það er rosalega mikið af kjaftæði þarna úti í kvikmyndabransanum. Myndir sem fjalla ekki um neitt raunverulegt eða koma ekkert inn á mannlega hegðun og hugsun. Svona myndir eins og Moonlight fá mann til að vilja halda áfram.En að sjálfsögðu er maður ánægður með árangurinn og þá sérstaklega fyrir hönd leikstjórans og tökuliðsins. Það er gott að vera minnt/ur á að maður sé að gera góða hluti.

En hvernig kom það til að myndin keppti á hátíðinni í Miami?

INFERNO er útskriftarmyndin mín úr Kvikmyndaskólanum frá haustinu 2015. Kristín Ísabella Karlsdóttir, sem er einnig útsrifaður nemandi úr KVÍ, tók að sér að leikstýra myndinni fyrir mig og stóð sig frábærlega að mínu mati. Ég sá auglýsingu á vefsíðunni FilmFreeway hjá hátíð að nafni WideScreen Film and Music Video Festival sem haldin var í Miami.Það sem dró athygli mína að þessari hátíð var þrennt: hversu góðar viðtökur hún fékk hjá öðrum kvikmyndargerðarmönnum, að hún var merkt IMDB og að hún bauð upp á flokk undir nafninu „Experimental“. Ég hafði verið að senda INFERNO á hátíðir undir hefðbundnum stuttmyndaflokki en ég áttaði mig síðar á að myndin tilheyrði þessum Experimental flokki þar sem skilgreiningin á Experimental myndum er að þær nota óhefðbundnar aðferðir til þess að segja sögur. 669 verk voru send á hátíðina en aðeins 130 verk voru valin. Þá var ég tilnefndur í flokknum „Best Experimental Short“ ásamt fjórum öðrum myndum. Síðan vildi svo skemmtilega til að við unnum í þeim flokki fyrir bestu mynd.

Áhuga sinn og rannsóknir á mannlegu eðli hefur Knútur nú tekið upp á næsta stig með því að setjast aftur á skólabekk.

Í augnablikinu er ég að læra sálfræði við Háskóla Íslands en á sama tíma er ég að undirbúa mögulegt tónlistarmyndband með félögum mínum í Flying Bus Films. Við erum að hittast og ræða saman mögulegar hugmyndir. Stundum deyja svona samræður út og stundum ekki. Samstarfið verður vonandi að veruleika í þetta skiptið. Þá er ég komin með ný tengsl við kvikmyndagerðarmenn víðsvegar um heiminn og markmiðið er að sjálfsögðu að reyna að nýta sér það. Það er aldrei að vita nema maður fari að vinna með einhverjum erlendis. Ef handritið er gott og leikstjórinn hefur eitthvað að segja sem hann/hún vill koma á framfæri þá er ég alltaf til.

Gott að vera minntur á að maður sé að gera góða hluti – Knútur Haukstein vann til verðlauna í Miami

Nú um áramótin gekk í gildi 5 ára þjónustusamningur  Kvikmyndaskólans við menntamála og fjármálaráðuneytið, um starfrækslu náms í kvikmyndagerð. Samningurinn gildir til ársins 2025. Nemendafjöldi skal vera að lágmarki 100 í fullu námi á ári. Um áramót gekk einnig í gildi ný viðurkenning frá Menntamálastofnun á 4 deildum skólans sem gildir til 3 ára.  

Kvikmyndaskóli Íslands gerir 5 ára þjónustusamning við íslenska ríkið

Kæru útskriftarnemar, foreldrar, fjölskyldur og vinir, kennarar og starfsfólk. Ég býð ykkur velkomin til þessarar útskriftar frá Kvikmyndaskóla  Íslands vorið 2020.

Það er alltaf ánægjulegt fyrir okkur starfsfólk skólans að útskrifa nemendur og sérstaklega á svona fallegum degi. Í gærkvöldi horfði ég á útskriftarmyndirnar ykkar og sannfærðist um að þið væruð tilbúin að fara út í djúpu laugina. Það kom mér á óvart hvað kórónuveiran hafði lítil áhrif á gæði verkanna. Því auðvitað rústaði þessi pest skólastarfinu á síðustu önn. En þið fenguð dýrmæta reynslu við að takast á við hið óvænta og sigrast á þeirri áskorun. Það er nefnilega eitt það mikilvægasta við kvikmyndgerð að geta brugðist við breyttum aðstæðum því það koma alltaf upp ófyrirsjáanlegir hlutir við gerð kvikmyndaverka. Eins og veðrið til dæmis, það er ekki til neitt veður hér á landi heldur bara dæmi um veður. Það breytist stöðugt og þá þarf að geta brugðist við því með því að nýta það okkur í vil, en ekki láta veðrið stjórna okkur. Það er reynsla mín að fallegustu myndskeið íslenskrar kvikmyndsögu voru skotin í fárviðri. Þegar ekki var hundi útsigandi en einmitt í slíku veðri felast tækifæri til að skilja okkar verk frá logn mollunni í Hollywood þar sem alltaf er sól og sumar. Þess vegna er það svo nauðsynlegt að þið gerið ykkur grein fyrir því fornkveðna að lókal er glópal. Þegar kemur að því að þið veljið ykkur framtíðarverkefni þá er hollt að hafa í huga að gera þau úr ykkar nærumhverfi. Hugsa eins og kokkur sem notar aðeins hráefni úr hans umhverfi. Og talandi um mat og kvikmyndir, reynið endilega að forðast að gera myndir sem eru aðeins hugsaðar til að drepa tíma líkt og skyndibitinn sem er til þess að slá á hungur í stuttan tíma. Reynið frekar að matreiða eitthvað sérstakt, beint frá býli. Það er alltaf upplifun að horfa á mynd frá framandi landi og kynnast menningu þess og siðum samanber “Sníkjudýrin” sem vann Óskarinn síðast. En hvaða umhverfi bíður ykkar ? Það góða við veiruna er að hún skapaði ástand í heiminum sem við getum nýtt okkur. Hún stoppaði alla kvikmyndagerð í heiminum þar sem hún grasseraði og þess vegna bíða nokkrar stórmyndir eftir því að verða teknar upp hér á landi. Þið ættuð öll að reyna að fá vinnu við þessi verkefni og safna reynslu. Því í okkar fagi erum við alltaf að læra og safna í reynslubankann.


Ég var einn af mörgum í nefnd sem menntamálaráðherra skipaði til að móta framtíðarsýn til næstu 10 ára. Þar er lagður grunnur að betra umhverfi fyrir ykkur til framtíðar, ef stjórnvöld framfylgja þessum tillögum. Meðal annars er lögð áhersla á stóraukna framleiðslu á sjónvarpefni og ódýrar byrjandamyndir. En kvikmyndagerð verður alltaf basl því heimsmarkaðurinn er svo smár. En þráin til að segja sögur verður alltaf að vera knúinn áfram af ástríðu fyrir kvikmyndaforminu því þá munuð þið fá ást ykkar endurgoldna. Það er löng leið frá hugmynd að kvikmynd þar til þið sjáið hana á tjaldi. Flestar myndir mínar hafa verið 5 ár í þróun því er það nauðsynlegt að hafa þolinmæði að leiðarljósi. Það er oft sársaukafullt að hafa þaulhugsaða mynd í hausnum og geta ekki tosað hana út vegna þess að það skortir fjármagn. En treystið mér, allar myndir hafa gott að því skolast til í heilabúinu því vitneskjan um að verkjataflan sé handan við hornið er svo skapandi. Þá er mikilvægt að hafa í huga að kvikmyndagerð er samvinna fjölda listamanna. Þessu má líkja við sinfóníuhljómsveit þar sem hvert hljóðfæri spilar hlutverk og ef einn falskur tónn er sleginn, þá þarf að byrja uppá nýtt. Þess vegna er tillitsemi við aðra sem koma að verkinu nauðsynleg til að ná sem bestum árangri. Það sem hefur reynst mér best er að hlusta á aðra sem vinna með mér. Því það fólk sem vinnur með þér hverju sinni er að bæta verkið. Sá sem hlustar ekki á hugmyndir annara endar oftast sem einangraður fáviti fullur af minnimáttarkennd. 


Skólinn okkar stendur á tímamótum og munum við flytja í nýtt húsnæði fyrir haustið. Þar erum við að hugsa til langrar framtíðar. Þá erum við að koma náminu á háskólastig. Þetta hefði ekki verið gerlegt nema fyrir velvild menntamálaráðherra, Lilju Alfreðsdóttur, sem leysti skólann úr áralöngum viðjum samningagerðar við ríkið og stendur núna við bakið á nemendum skólans að koma náminu á háskólastig. Eins og margir hafa kannski séð erum við að auglýsa eftir aðstoðarrektor. Þetta er ný staða sem er ætlað að stýra yfirfærslunni á háskólastig og uppbyggingu alþjóðlegar deildar.

Þar sem Kvikmyndaskólinn er nú nákvæmlega staddur, er að á mánudaginn 29. júní fundar Gæðaráð Íslenskra háskóla um beiðni Mennta- og menningarmála ráðuneytisins um skipan 3 manna umsagnarnefndar erlendra sérfræðinga, sem gefa á ráðherra umsögn um fyrirliggjandi háskólabeiðni. Kvikmyndaskólinn hefur lagt fram þá ósk að væntanleg úttekt fari fram í september og að væntanleg viðurkenning liggi fyrir 1. desember. 


Ástæðan fyrir því að við sækjum eftir flýtimeðferð er mikilvægi kvikmyndaiðnaðarins fyrir íslenskt efnahagslíf og samfélag. Það er orðið mjög brýnt fyrir greinina koma á háskólanámi og fyrir nemendur skiptir öllu máli að þeir eigi greiða leið í sérnám, eða annað framhaldsnám.


Það eru ekki einungis nemendur framtíðarinnar sem hér er um ræðir. Kvikmyndaskólinn hefur starfað eftir háskólaviðmiðum frá árinu 2010, eða í raun allt frá 2007. Á þessum tíma hefur skólinn útskrifað 500 nemendur og ætla má að töluverður hluti þeirra myndi vilja nýta sér mat á námi sínu inn í BA námsleið. Þar á meðal þeir sem eru hér í dag að útskrifast.


Stefnt er að því loka samningum við Háskóla Íslands um leið og háskólaviðurkenning Kvikmyndaskólans liggur, og bjóða upp á 1 árs nám við hina frábæru kvikmyndadeild sem þar er starfrækt, til BA gráðu. Væntingar Kvikmyndaskólans er að hægt verði að bjóða upp á þessa þriggja ára námsleið í samtarfi við HÍ á vorönn 2021. Þá liggi einnig fyrir mat á eldra námi. Þess verður að geta að viðræður við Háskóla Íslands hafa staðið yfir um árabil og útfærslur liggja í stórum dráttum fyrir. Í raun hefst háskólanámið í haust og það er starfsemi haustannar sem verður metin sem háskólastig.


Kvikmyndaskólinn er nú þegar farinn að hefja umbreytinguna. Skipuð hefur verið dómnefnd fjögurra valinkunnra doktora, til að meta hæfi væntanlegra akademískra starfsmanna. Væntanlegir prófessorar verða ráðnir í ágúst. Þá er einnig nýtt 12 manna háskólaráð sem meðal annars er skipað fulltrúum frá öllum helstu fagfélögum kvikmyndagerðarmanna og leikara. Ýmislegt fleira er undirbúningi. Engar grundvallarbreytingar eru væntanlegar í námskrá og Kvikmyndaskólinn er þess fullviss að faglega stenst hann kröfur, enda hefur skólinn verið í alþjóðlegu samstarfi um árabil og hefur getað borið gæði starfseminnar saman við alla helstu kvikmyndaskólana erlendis.


Á tímum sem þeim sem nú ríða yfir íslenskt efnahagslíf, þar sem tekjur hafa dregist saman um tugi prósenta  og atvinnugreinarnar og fólkið í landinu keppast að koma atvinnulífi og tekjuöflun í gang, þá er mjög mikilvægt að menntakerfið og stjórnvöld bregðist hratt við. Það að Kvikmyndaskólinn fái háskólaviðurkenningu og nemendur fái háskólagráðu flýtir beinlínis fyrir uppbyggingu mikilvægrar atvinnugreinar. Það er mikilvægt að gera sér grein fyrir að kvikmyndaiðnaðurinn hefur um árabil verið í hópi 15 veltuhæstu atvinnugreina landsins og hefur mikla möguleika til vaxtar. Í þessari stöðu er mjög mikilvægt að nám í Kvikmyndaskólanum sé rétt metið, þannig að hann geti veitt sem bestan stuðning.


Móðir mín var vön að byrja sínar ræður á því að segja; “Í dag er sá dagur sem vert er að minnast”. Það verða mín loka orð, til hamingju með þennan fallega dag og megi hann verða ykkur minnisstæður.


Í gær voru tilkynntir verðlaunahafar Örvarpsins og var það Eyþór Jóvinsson sem hlaut Örvarpann 2016 fyrir mynd sína Amma. Eyþór er nemandi úr Handrit/Leikstjórn.

Útskrifaðir nemendur Kvikmyndaskóla Íslands voru einnig sigursælir á verðlaunahátíð Örvarpans í Bíó Paradís því Atli Þór Einarsson, útskrifaður úr Leikstjórn/Framleiðslu  hlaut sérstök hvatningarverðlaun fyrir myndina Von og myndin Breakfast eftir Garðar Ólafsson, sem er úskrifaður úr Skapandi tækni varð hlutskörpust í kosningu áhorfenda.

Það er ekki amaleg frammistaða hjá nemendum skólans að krækja þannig í öll verðlaun hátíðarinnar og óskar skólinn þeim að sjálfsögðu til hamingju með þennan einstaka árangur.

Nemendur KVÍ með öll verðlaun á hátíð Örvarpsins

Við tilkynnum með mikilli ánægju að tveir nýjir fagstjórar hafa hafið störf við Kvikmyndaskólann.

Við bjóðum velkomna Valdísi Óskarsdóttir sem hefur tekið stöðu fagstjóra Klippingar.

Hún kemur inn hlaðin reynslu og hefur verið tilnefnd og unnið til fjölda verðlauna, hlotið meðal annars Bafta verðlaunin fyrir vinnu sína við myndina “Eternal Sunshine of the Spotless Mind” og Edduna fyrir “Hafið” í leikstjórn Baltasars Kormáks. Hægt er að fræðast nánar um Valdísi og langan verka lista á eftirfarandi vefsíðum;

Wikipedia , Imdb og síðast en ekki síst hennar eigin heimasíða

Við tökum einnig fagnandi á móti Ara Kristinssyni sem tekur við stöðu fagstjóra Kvikmyndatöku.

Það eru fá störf innan kvikmynda iðnaðarins sem Ari hefur ekki nálgast og fyrir utan nám í listum hefur hann áratuga reynslu í kvikmyndagerð. Hann hefur unnið við fjölda íslenskra mynda, þar á meða “Börn náttúrunnar” sem var framlag íslendinga til Óskarsverðlaunanna á sínum tíma og hlaut Ari heiðursverðlaun Montréal World Film Festival fyrir kvikmyndatöku myndarinnar.

Hægt er að nálgast frekari upplýsingar um Ara á eftirfarandi vefsíðum; Imdb og á síðu Félags Íslenskra Kvikmyndatökumanna 

Nýjir fagstjórar hefja störf við skólann

Heimur kvikmyndanna er ansi fjölbreyttur og það hefur varla farið framhjá neinum að kvikmyndafólk hérlendis er að setja sitt mark á þann heim um víða veröld. Hér hjá Kvikmyndaskólanum eru fjórar námsleiðir í boði;

Við bjóðum ykkur að koma á opið hús hjá okkur, þar sem við kynnum starfsemi okkar, þriðjudaginn 1.október næstkomandi, frá kl.14-16.

Gestir fá að skyggnast inn í kennslustundir og vinnurými, fá að fylgjast með nemendum undirbúa verkefni annarinnar og fá tækifæri til að spjalla við kennara og nemendur.

Hér er hægt að melda sig á viðburðinn á Facebook og fá upplýsingar.

Um 8000 netnotendur höfðu deilt auglýsingu Tjarnargötunnar, Útmeð´a tveimur sólahringum eftir að hún kom út. Það er eftirtektarverður árangur en tveir útskrifaðir nemendur Kvikmyndaskóla Íslands eru í teyminu á bak við verkið.
vann að verkefninu að beiðni Geðhjálpar og Rauða Krossins og voru Tómas Ingi Doddason og Freyr Árnason, útskrifaðir nemendur Kvikmyndaskolans í teyminu.


Þegar við hjá Tjarnargötunni fórum á fyrsta fundinn með þeim vissum við að við vildum taka þátt í þessu verkefni. Þetta er mjög verðugt málefni og við vorum sammála um það frá fyrsta degi að markmið verkefnisins væri annars vegar að aðstoða fólk sem erí vanda statt, að leita sér aðstoðar ásamt þvi að opna á umræðuna í þjóðfélaginu og fjarlægja þennan tabú stimpil á þessu málefni.

Tómas Ingi útskrifaðist vorið 2011 úr KVÍ en Freyr vorið eftir.

Eftir útskrift var ég mikið til að byrja með reyndi ég mikið að koma mér á framfæri sem leikari. Eins og menn vita þá tekur það oft langan tíma og þurfti ég þess vegna að vinna í hinum ýmsu störfum. Ég fór meðal annars á vertíð á Þórshöfn sem að var mjög lærdómsríkt. Hjólin fóru síðan loksins að snúast þegar Freyr hringdi í mig og bað mig um að leika í Samsung auglýsingu fyrir Tjarnargötuna.

Eftir það lék Tómas Ingi í nokkrum verkefnum fyrir Tjarnargötu og aðra.

Síðar fékk ég að vinna til reynslu hjá þeim sem hugmyndasmiður, fyrir rúmu ári síðan og hef verið á Tjarnargötunni síðan. Ásamt því að vera hugmyndasmiður, þá hef ég einnig fengið að spreyta mig sem leikstjóri og framleiðandi nokkrum sinnum. Ég get alveg viðurkennt það að þegar ég hugsaði til framtíðar fyrir nokkrum árum þá sá ég mig kannski frekar fyrir framan kameruna en fyrir aftan hana. En svona virkar lífið oft og ég gæti ekki verið hamingjusamari.

Tómas Ingi segir að á Tjarnargötunni séu oft mörg járn í eldinum í einu.

Við skiptum okkur niður í teymi og vinnum út frá því.“Útmeð’a verkefnið var mjög stórt í sniðum og það var mjög krefjandi að vinna það. En verkefnin eru jafn fjölbreytt og þau eru mörg. Núna er bara allt farið á fullt aftur að gera auglýsingar, taka upp flottar samantektir og ýmislegt fleira skemmtilegt. Ég er reyndar stunginn af í síðbúið sumarfrí og ætla að reyna að hugsa sem minnst um þetta allt saman í nokkrar vikur”.

En hver skyldi vera ástæðan fyrir því að verkefnið Útmeð´a hefur gengi jafn vel og raun ber vitni.

Fyrir utan alla hjálpina frá Geðhjálp, Rauða Krossinum, Playmo og öðru fagfólki, sem auðvitað skipti sköpum er vert að nefna að Tjarnargatan er lítill og þéttur hópur þar sem að allir þekkja sitt hlutverk mjög vel, og sinna því virkilega vel. Það eiga allir part í þessu. Það var mikill samhugur í fólki að gera þetta sem allra best og það er svo sannarlega útkoman.
En burt séð frá því að allir sem að máli koma eru mjög ánægðir með hvernig verkefnið kom út, þá skiptir auðvitað mestu máli það að þetta muni koma til með að hjálpa fólki,

segir Tómas Ingi en hann vill að lokum koma á framfæri þakklæti til alls þess frábæra fólks sem þeir félagar fengu tækifæri til að vinna með við gerð auglýsingarinnar.

Áhrifamikil auglýsing Útmeð´a úr smiðju útskriftarnema KVÍ á Tjarnargötu

Stuttmynd  Elsu G. Björnsdóttir, „Sagan endalausa“ vann til verðlauna á  listhátíðinni Clin d´Oeil  í Reims í Frakklandi um síðustu helgi.

Hátíðin er haldið á tveggja  ára fresti  og hittist þar heyrnarskert listafólk úr öllum greinum til að kynna verk sín.

„Döff listamenn um allan heim sækja um að komast á þessa sýningu með sín verk því þarna er hægt að búa til ótrúlega gott tengslanet, kynnast og sjá aðra performera.“ Segir Elsa.

„Ég sendi mína stuttmynd auðvitað út enda er það mikið tækifæri að komast út á hátíð af þessu tagi.“

Í  ár voru 5000 manns samankomnir í borginni í tengslum við hátíðina. Þátttakendur sjálfir  fá allan kostnað greiddan  en Elsa er himinlifandi að auk þess að  vera boðið á hátíðina hafi hún unnið til veglegra verðlauna.

Elsa  útskrifaðist úr leiklistardeild Kvikmyndaskóla Íslands  árið 2010 og hefur síðan fengist við gerð eigin mynda. Hún segir að stuttmynd  sín fjalli um upplífun „döff“  barna sem voru uppi á þeim tíma sem táknmál var bannað um allan heim, 1880 til 1980, eða  í 100 ár.

„Ætlast var til að heyrnarskertir skildu allt með því að lesa af vörum og var þeim bannað að tjá sig á táknmáli. Þau ættu einnig að sýna nú fólki sem heyrir hvað þau  er nú dugleg að tala. Myndin er köld upprifjun frá þessu timabili. “

Mynd Elsu  er hljóðlaus en þá leið valdi hún i þeim tilgangi  upplifun áhorfandans yrði sem líkust upplífun barnanna sem fjallað er um.  Þannig er áhorfandanum ekki gert auðvelt að skilja það sem fram fer.   Stuttmyndina kallar Elsa “Söguna endalausu” (The Endless Story) af þeirri einföldu ástæðu að enn glíma heyrnarskertir við að svipuðum aðferðum sé beitt  og þekktust á þessum árum.

„Ég er auðvitað upp með mér, algerlega sveif upp á bleikt ský við að vinna bestu myndina. Aðeins sex verðlaun eru veitt þarna og þau eru fyrir bestu  “youth2 myndina, bestu “animation” myndina, bestu leikkonuna, leikarann og  leiksstjórann og svo besta myndin overall… og já í þetta sinn ákvað frönsk sjónvarpsstöð að styrkja vinningshafann fyrir bestu myndina um 1000 evrur!“

Hún bætir við að hún hafi því  fengið fyrstu fjármunina  til að framkvæma næsta verkefni  enda skorti sig ekki hugmyndirnar, miklu frekar fjármunina í þessari dýru grein.

„Þetta kemst næst því að vinna óskarinn fyrir mig. Verðlaununum  fylgir að fólk tekur eftir verkefnunum mínum, sækist eftir að sjá verkið og auðveldara verður að koma myndinni á fleirri hátíðir. Að sjálfsögðu vita núna allir í döffheimnum um allan heim hver ég er og ég get ekki sagt annað en að þetta var það besta sem hægt er að koma fyrir döff listamann eins og mig á eyju lengst út í  Atlantshafi. Hverjar eru eiginlega líkurnar á að svona gerist?“

Stuttmynd Elsu G. Björnsdóttur vinnur aðalverðlaun í Reims

Nemendur á fyrstu önn Leikstjórnar og Framleiðslu sátu kúrs með fagstjóra Leikstjórnar, Hilmari Oddsyni (Tár úr Steini) í myndrænni frásögn þar sem þau leikstýrðu æfingarverkefni ásamt því að byrja undirbúning að lokaverkefni annarinnar sem er 7 mínútna stuttmynd með engu tali. Nemendur á 2.önn luku námskeiði í Leikstjórn með Berki Gunnarssyni (Þetta Reddast) þar sem þau leikstýrðu bæði nemendum úr leiklist ásamt atvinnuleikurum og sátu námskeið í handritsgerð með Hrafnkeli Stefánssyni (Borgríki). Nemendur á 4.önn tóku handritsnámskeið í leiðsögn Huldars Breiðfjörðs (Pabbahelgar, Undir Trénu) og unnu að undirbúningi útskriftarmyndar sinnar.

Nemendur á 1.önn hófu námskeið í hljóðvinnslu með fagstjóra hljóðs, Kjartani Kjartanssyni (101 Reykjavík), ásamt því að byrja undirbúning að lokaverkefni annarinnar sem er 7 mínútna stuttmynd með engu tali. Nemendur á 2.önn unnu sátu klippinámskeið með fagstjóra klippingar Davíð Alexander Corno (Kona fer í stríð). Nemendur á 3.önn eyddu vikunni í tökum, þar sem hvert og eitt þeirra skaut heimildarmynd undir leiðsögn Björns Ófeigsson (Latibær). Nemendur á 4.önn sátu kúrs í framleiðslu með Arnar Benjamín (A Reykjavik Porno) og kvikmyndatöku með Bjarna Felix Bjarnarssyni (Borgríki) þar sem þeir undirbjuggu tökur fyrir útskriftarmyndina sína. 

Nemendur á 2.önn luku námskeiði í Leikstjórn með Berki Gunnarssyni (Þetta Reddast) þar sem þau leikstýrðu bæði nemendum úr leiklist ásamt atvinnuleikurum og sátu við endurskriftir að “pilot” sjónvarpsþætti  undir leiðsögn Daggar Mósesdóttur (Me & Bobby Fischer). Nemendur á 4.önn sátu handritsnámskeið undir leiðsögn Huldars Breiðfjörðs (Pabbahelgar, Undir Trénu) ásamt því að vinna að endurskriftum að handriti í fullri lengd, undir leiðsögn Hrafnkels Stefánssonar (Borgríki) sem þeir hafa verið að vinna í síðan á fyrstu önn.

Nemendur á 1.önn hófu námskeið í Leiktækni með Rúnar Guðbrandssyni (Svartur á Leik), námskeið í Raddtækni með Þóreyju Sigþórsdóttur (Agnes) og Leik og hreyfingu með Guðmundi Elíasi Knudsen, ásamt því að byrja undirbúning að lokaverkefni annarinnar sem er 7 mínútna stuttmynd með engu tali. Nemendur á 2.önn luku raddþjálfunar námskeið með Þóreyju Sigþórsdóttur (Agnes), með glæsilegri kynningu, og sátu kúrs í Leiktækni með Rúnari Guðbrandssyni (Svartur á Leik). Nemendur 3.annar var leikstýrt af nemendum 2.annar í Leikstjórn, þar sem þau léku á móti atvinnuleikurum ásamt því vinna í Leiktækni undir leiðsögn Hannes Óla Ágústssonar (Málmhaus). Nemendur á 4.önn sátu námskeið í gerð dansmyndbands undir leiðsögn Kolbrúnar Önnu Björnsdóttur (Svartir Englar) og Rut Hermannsdóttur, námskeið í gerð showreel, æfingar fyrir áheyrnarprufur og námskeið með Árna Beinteinssyni í talsetningu.

Vikan svo endaði að venju með kvikmyndasögu í Bíó Paradís.

Árshátíð Kínema er á föstudaginn 28.febrúar og er síðasta tækifærið til að kaupa miða á hana er á miðvikudaginn, 26.febrúar.

Unnið með atvinnu leikurum og árshátíð á næsta leiti

Kvikmyndaskóla Íslands var gert, eins og öðrum framhalds -og háskólum, að loka á meðan á samkomubanni vegna Covid-19 stendur yfir og hefur kennsla skólans verið alfarið í fjarkennslu undanfarnar 2 vikur. 

Vissulega hefur þetta haft áhrif á námið – enda að miklum hluta verklegt, t.d. þegar kemur að tökum nemanda á hinum ýmsu kvikmyndaverkum en nemendur mega eiga það að hafa tekið þessu breytingum með jákvæðni og hafa náð að viðhalda sköpunarkraftinum og stemmningunni sem að venju má finna innan veggja skólans – utan skólans. 
Það er ljóst að þegar samkomubanni lýkur umbreyttist í skólinn í framleiðsluhús og bíðum við öll spennt eftir því. 


Nemendur 1.annar luku námskeiði í tónlistarmyndböndum og hófu að læra framleiðslu og leikstjórn. Nemar á 2.önn sátu námskeið í framleiðslu og undirbúa þar tökur, ásamt handritsnámskeiði. 4.annar nemar sátu námskeið í leikstjórn og undirbjuggu heimildarmyndir sem þeir munu frumsýna í lok annar.


Nemendur 1.annar hafa setið við námskeið í eftirvinnslu, bæði grunn í myndbreytingum og klippingu. Nemendur á 2.önn hafa einnig unnið í eftirvinnslu,  að læra að hljóðvinna stuttmyndir sem hvert þeirra tók upp fyrr á önninni. Nemar á 3.önn sátu námskeið í endurgerð senu / “storyboard”, og að undirbúa þar tökur. Nemar á 4.önn sátu svo við með leiðbeinanda að klippa útskriftarmyndirnar sínar.

Nemendur á 2.önn sátu námskeið í handritum í fullri lengd þar sem þau undirbjuggu verkefni sem þau munu skrifa á næstu önn, ásamt því hefja námskeið í heimildarmyndum þar sem þau undirbúa hvert sína heimildarmynd sem mun vera tekin að loknu banni. 
Nemendur á 4.önn sátu leikstjórnarnámskeið þar sem þeir undirbjuggu útskritarmyndir sínar, ásamt námskeið í endurskrifum á handritum í fullri lengd.

Nemendur á 1. og 2.önn sátu námskeið í leiklistarsögu. Þetta er fyrr á þeirra námsferli en áætlað var en munu fara í námskeið sem krefjast líkamlegri nánd síðar á önninni og næstu önnum. Nemendur á 1.önn sátu einnig hreyfi námskeið með því að taka upp og dreifa danshreyfinga myndböndum sín á milli og nemendur á 2.önn undirbúa leikverk sem þau munu setja á svið í lok annar.
Nemendur á 3.önn sátu námskeið í endurgerð senu og “storyboard” og undirbjuggu þar tökur sem hefjast að loknu samkomubanni. Nemendur á 4.önn unnu í persónum sem þau leika í útskriftarmyndum sínum ásamt því undirbúa tökurnar fyrir þær eftir bestu getu.

Kvikmyndaskóli Íslands á tímum Covid-19

Útskriftarbæklings  Kvikmyndaskóla Íslands á haustönn er jafnan beðið með mikilli eftirvæntingu af öllum þeim sem fylgjast með starfsemi hans.

Nú er hægt að nálgast hann stafrænt hér á heimasíðu skólans og stutt í að prentuð útgáfa verði einnig  tilbúin.

Ritið gefur góða mynd af því efni sem nemendur skila af sér við útskrift auk annarra verkefna sem nemendur hafa skilað af sér á önninni. Þá skrifa deildarforsetar greinar til kynningar á deildum sínum  en annars er sjón sögu ríkari.

Útskriftarbæklingur á haustönn kominn á vefinn

Cilect samtökin voru að kynna úrslit í árlegri nemendamyndasamkeppni. Eins og venjulega var keppt í þremur flokkum, flokki leikinna stuttmynda, heimildarmynda og animation (teikni) mynda. KVÍ hefur hingað til aðeins sent myndir í flokk leikinna mynda. Alls bárust 110 framlög í þann flokk í þetta skiptið. Framlag okkar var stuttmyndin Himinn og jörð, útskriftarverkefni þeirra Ásgeirs Loga Axelssonar og Ragnars Inga Magnússonar úr Deild 2. Myndinni var leikstýrt af Aroni Þór Leifssyni úr Deild 1.

Það er okkur sérstakt ánægjuefni að tilkynna að KVÍ (IFS), þ.e. Himinn og jörð, hafnaði í 20. sæti af 112, sem verður að teljast verulega góður árangur, enda stökkvum við uppum 32 sæti milli ára. Kvikmyndaskóli Íslands óskar aðstandendum, og okkur öllum, til hamingju með glæsilegan árangur, sem á vonandi eftir að verða núverandi nemendum hvatning til frekari afreka.

segir Hilmar Oddson, rektor skólans í tilkynningu af tilefni af þessum frábæra árangri.

Röð efstu mynda í keppni Cilect var eftirfarandi:

Everything will be okay – UMDK í Austurríki

Beautiful figure – SxFE í Ungverjalandi

Boat people – HFF í Þýskalandi ………..                                                                                20.   The Wedding Gift (Himinn og jörð) – IFS (KVÍ)

Í flokki heimildarmynda varð The Archipelago frá NFTS í Beaconsfield/London hlutskörpust og Edmond frá sama skóla varð hlutskörpust í flokki “animation” mynda.

Helstu verðlaunamyndirnar verða sýndar á sérstöku Cilectkvöldi innan tíðar og verður sú sýning auglýst sérstaklega síðar.

Mynd úr Kvikmyndaskólanum meðal efstu 20 mynda í keppni Cilect – “Verulega góður árangur” segir rektor

Fyrsta önn Leikstjórnar sátu námskeið í framleiðslu með Hlín Jóhannesdóttur (Bokeh, Svanurinn) og leikstjórn þar sem er unnið með leikaravinnu undir leiðsögn Þorsteins Bachman (Lof mér að falla, Vonarstræti) ásamt fyrstu önn Handrita og Leikstjórnar.  Þriðja önn Leikstjórnar og Framleiðslu, ásamt þriðju önn Handrita og Leikstjórnar fóru í námskeið um leikstjórn hjá Gunnari B. Gunnarssyni (Gauragangur, Astropia), þar sem þau æfðu sig í nálgun leikstjóra á senum með áherslu á samspil leiks og myndavélar.  

Nemendur á fyrstu önn Skapandi Tækni luku fyrsta kúrs í klippingu undir leiðsögn ásamt kúrs í myndbreytingu undir leiðsögn Sigurgeirs Arinbjarnarsonar (Everest, Star Trek Discovery). Nemendur á annari önn sátu kúrs í hljóðvinnslu með Kjartani Kjartanssyni (Sódóma Reykjavík) , ásamt því að fara í listasögu hjá. Þau luku svo einnig námskeiði í leikmyndagerð með Ara Birgi Ágústssyni (Hjartasteinn, Grafir og Bein). Þriðja önn hóf að klippa heimildar myndinar sínar sem þau unnu í kvikmyndatöku áfanga fyrr á önninni, undir umsjón Davíðs Alexander Corno (Undir Halastjórnu, Kona fer í stríð).

Fyrsta önn Handrita/ Leikstjórnar sátu námskeið í handritum í fullri lengd undir leiðsögn Hrafnkels Stefánssonar (Kurteist Fólk, Borgríki) þar sem þau hefja vinnu að handriti sem þau munu vinna áfram næstu annir og leikstjórn þar sem er unnið með leikaravinnu undir leiðsögn Þorsteins Bachmans (Lof mér að falla, Vonarstræti) ásamt fyrstu önn.  Þriðja önn, ásamt þriðju önn Leikstjórnar og Framleiðslu, fóru í námskeið um leikstjórn hjá Gunnari B. Gunnarssyni (Gauragangur, Astropia), þar sem þau æfðu sig í nálgun leikstjóra á senum með áherslu á samspil leiks og myndavélar.  

Nemendur á fyrstu önn Leiklistar luku námskeiði í leiktúlkun hjá Rúnari Guðbrandssyni (Svartur á leik, XL) með glæsilegri kynningu, ásamt námskeiði í leik hreyfingu með Guðmundi Elíasi Knudsen. Nemendur á annarri önn luku námskeiði í raddbeitingu hjá Þóreyju Sigþórsdóttur (Agnes, Kaldaljós) og  námskeiði hreyfingu með Álfrúnu Örnólfdóttur (Dís) þar sem unnið var með líkamann í yoga, ásamt þriðju önn. Þriðja önn sat svo kúrs í Leik og Rödd með Þórunni Ernu Clausen (Lói) þar sem þau héldu áfram vinnu að söngleik sem þau munu skrifa og setja á svið í lok annar.   

, nemendafélag Kvikmyndaskóla Íslands, bauð upp á handrita vinnustofu á þriðjudeginum.

Upptökur á útskriftar myndum héldu áfram í vikunni

Black Magic Design hefur fært Kvikmyndaskóla Íslands veglega gjöf en um erað ræða tvær nýjar upptökuvélar.
Vélarnar sem um ræðir eru af gerðinni Blackmagic URSA 4K Digital Cinema Camera – PL Mount. Vélarnar taka upp 4K efni og segja tæknisérfræðinga skólans þær vera mikilvæga viðbót við tækjakost skólans.
Kvikmyndaskóli Íslands þakkar Black Magic Design fyrir höfðinglega gjöf.

3840 x 2160p Global Shutter CMOS Sensor12 Stops of Dynamic Range10.1″, 1080p Flip-Out LCD ScreenDual 5″ Touchscreens for Menu AccessRecords CinemaDNG RAW and Pro Res 422 HQ12G-SDI Output for 10-Bit 4:2:2 4K2x XLR Audio Inputs with Phantom PowerAluminum Frame with 3/8″-16 MountingLANC Port for START/STOP, Iris, FocusDual CFast 2.0 Card Slots

Höfðingleg gjöf frá Black Magic Design til Kvikmyndaskólans

Niðurstöður leitar